台大文學院「林茂生紀念會議室」揭牌儀式致詞（5之3）／周婉窈（含林詠梅感謝詞）
周婉窈
院長、各位來賓：
逐家好。今仔（2026/6/26）日是台大文學院，嘛是台灣歷史上真重要的一个時刻：林茂生先生佇日本時代參與反殖民運動，戰後是台灣大學文學院實際上第一任的院長，伊佇二二八事件中受難，79冬後林茂生先生的名欲來成做文學院會議室的正式名稱。
1989年2月28佇文學院後壁的空地仔，台大學生第一改舉辦「台大二二八追思會」，學生攑「追悼林茂生先生」的牌仔，彼當時林茂生先生的查某囝林詠梅佮後生林宗平（今仔日出席的就是伊的囝仔），以及宜蘭受難的郭章垣醫生的查某囝郭勝華攏有來參加。37冬後的今仔日，林茂生先生袂少的囝兒干單賰詠梅女士猶閣健在，今馬蹛佇咧美國東岸。
2022年3月文學院學生代表建議佇文學院紀念林茂生先生，這項代誌，我有共林女士講過，最近我共伊講文學院的會議室欲號做「林茂生紀念會議室」，林女士真感動，足想欲轉來參加揭牌儀式，毋過伊已經88歲矣，遠路旅行有較勉強，所以伊央我替伊讀感謝詞。這是林女士欲共逐家講的內容：
各位在場的來賓，逐家平安！
我是林詠梅，周教授共我講文學院會議室欲掛牌紀念我的父親林茂生先生，予我真感動！
台大文學院是我記持內面無法度袂記得的所在。我的老爸佇文學院的時，我讀北師附小*四年的，放學的時，有幾遍我想著父ちゃん猶閣佇咧上班，我就由學校行來文學院伊的辦公室，伊看著我來，就愛笑，我就恬恬坐佇邊仔，看伊做工課，抑是和人講話，下班了後伊就𤆬我做伙轉去。
我的老母欲離開世間的時，共我的二兄宗義講：「我足數念恁父ちゃん，這三十冬來，我逐日攏佇咧數念伊，我真歡喜，我就欲去見伊矣。」和阮阿娘（a-niâ）相仝，我嘛真數念阮父ちゃん，79冬來攏無放袂記得。
我真歡喜，台大的少年學生知影二二八、知影林茂生，閣會想欲佇文學院用伊的名來紀念伊。我嘛真感謝鄭院長盡心盡力完成這項代誌。
台大文學院是林茂生博士最後工作的所在，會當佇遮紀念伊，是足有意義的代誌，嘛予家屬真大的安慰。。
懷抱著感激的心，我佇遙遠的美國，祝福逐家健康平安，祈求上天保護咱心愛的台灣。
以上。〔代讀結束〕
最後容允我補充一下。這个門牌的「林茂生」三字，是林茂生的題字「丹心存萬古」的簽名，這馬是國立台灣文學館的收藏。
林茂生的字真受彼當時的人的喜愛，毋過伊失蹤了後，字墨四散。〔投影片〕正手這兩本是2002佮2003年「林茂生詩墨展：桃源在何許」的展覽圖錄。（投影片倒手這本是《林茂生文獻選輯》，2024）書法家杜忠誥對林茂生的字有真懸的評價，嘛真欣賞這五字，伊按呢呵咾：「氣勢豪邁而瀟灑」。
這是1924年，一百冬前，林茂生寫予張深切的，這句「丹心存萬古」煞若親像是伊替伊家己寫的。咱相信：林茂生對台灣的忠愛之心（伊的丹心）永遠會留佇咧這个島嶼世世代代的記持內面。
咱按呢相信，為著按呢咱做伙努力！
感謝逐家的聆聽！
*北師附小，今國立台北教育大學附設實驗國民小學。
