【決戰國會，公民不退，開票之夜】濟南路開票晚會 — 周婉窈老師發言內容
台灣經濟民主連合
感謝在場的朋友耐心看這支影片。對線頂看直播的朋友，有較歹勢，因為一寡仔授權的問題，影片袂當透過直播予逐家看，請多多包涵。
今仔日投票的結局，較停仔就會陸續知影，我想逐家攏真緊張，我嘛是。這幾日應該真濟人睏袂好勢。
這的黨外運動的影片是欲提醒咱逐家：台灣的自由民主是戰後黨外運動的參與者，犧牲、奮鬥，用青春、血汗，甚至坐監、奉獻性命，才爭取來的。前後四十幾冬。這敢是黨國統治者賞賜的？是無？毋是嘛。
咱的社會佇1992年自由民主化，了後，閣經過二、三十冬，因為咱台灣集體的努力，才有今仔日誠好蹛的台灣。咱的社會，當然猶有無完滿的所在，毋過，足濟人有機會留佇外國工作、生活，嘛是選擇轉來台灣蹛。除了蹛起來真好勢以外，就是台灣是咱的愛，咱生命存在的意義的所在。就算講留佇外國，心心念念的就是咱台灣。
咱愛台灣。最近佇面冊佮Threads，足流行這句詩，是引用智利詩人Neruda（聶魯達）的詩句：
我若必須死一千改，我甘單欲死佇遐。
我若必須生一千改，我甘單欲生佇遐。
我彼个小小濟山的國家。
咱愛這个有真濟山的小小的島嶼，伊是咱的國家，就算講目前猶無具足──必要的條件猶無充足。這是咱要閣繼續拍拚的所在。
黨外運動佮咱過去三十外冬的拍拚，才起造今仔日 台灣自由民主的生活方式。莫講傷遠，咱甘單想疫情彼三冬就好。這敢是國民黨予咱的？是無？毋是嘛。
大罷免就是欲顧這个台灣人八十冬來犧牲奮鬥建立的生活方式。咱一定愛共伊顧牢牢，袂當予伊烏有去，無去！著無？
台灣的自由民主的生活方式，一旦無去，這毋是閣奮鬥數十年就救會轉來的，有可能就跋落去萬丈的深坑，烏暗的所在，看袂著光。
為著咱濟濟的前輩，為著咱家己，為著咱的子兒孫，尤其是幼嬰兒，咱一定要奮鬥到最後一刻。
做台灣人有夠辛苦，毋過，咱就是甘單想欲做台灣人。這是咱的宿命，是咱的路，咱手牽手做伙行這最後的一里路。
最後予我用幾秒鐘來表達我──我想是咱逐家──對這改大罷免所有的志工表達敬意佮謝意。黨外精神就是拚生拚死，無惜一切，攏是為台灣。咱佇志工的身軀頂，嘛看著黨外精神的延續：就是拚生拚死，無惜一切，攏是為咱台灣。這是咱的民間力量閣再一遍的展現，嘛是欲救咱台灣上重要的力量。我深深一鞠躬，代表逐家感謝所有的志工！！（一鞠躬）
多謝！！不管今仔日開票的結果是按怎，咱繼續做伙拍拚！！好無！！
（轉載自：台灣經濟民主連合 2025/7/26 臉書貼文）
