《為前進而戰：盧修一的國會身影》新書發表會台語致詞（舊文重刊）
周婉窈
編按：這是四年前盧修一逝世23年紀念日（2021/8/6），作者出席《為前進而戰：盧修一的國會身影》新書發表會的致詞稿，當時正是武漢肺炎疫情很嚴重的時候，參加者入場要快篩，也都戴口罩。盧修一生於1941年5月22日，逝世於1998年8月6日。謹以此舊文紀念黨外運動者也是政治犯盧修一先生。
陳〔郁秀〕董事長、在座的來賓，佮線頂的朋友，大家午安。
今阿日真榮幸，會當來參加這個盛會，今仔日也是一个追思懷念的日子。
這本冊《為前進而戰：盧修一的國會身影》，還袂出版進前，我就看過矣，寫了真好，嘛予我閣再一遍會當來認捌盧委員。這本冊主要是佇咧寫盧委員最後八冬按怎佇國會為台灣打拼，為改變現狀奮鬥，為打造未來努力。
國會問政的書真歹寫，過程遐複雜，真焦（ta／乾）真硬，有時陣硬拼硬，無啥物好看頭，嘛無啥物romantic的代誌好寫，hőng（予人）拍kah入院是有的，不過，咱的作者藍麗娟老師實在真會呵咾tit lih，伊kā盧委員佇國會推sak法案的過程寫kah真予人看會落去，真無簡單。另外，這本冊閣收真濟的相片，會當講是台灣1990年代民主運動真好的教材。
這本冊的重要性，我佇序文內面已經寫真濟，在遮就莫重複來講。今阿日是23冬前，盧委員離開伊上愛的家後佮三个可愛的囝仔的日子，也是離開伊所摯愛的台灣佮台灣人民的時陣。伊對某子的愛，和伊對島嶼的愛，無法度分割，彼是一體的兩面，我定定佇想：這款愛欲按怎割捨會落neh？尤其現此時的台灣，咱敢有做kah這23冬來應該做的代誌neh？咱敢有做kah予盧委員會當安息，毋免一直掛慮neh？我想，咱無。
根據我的觀察，戰後台灣的歷史，伊的時間的寸尺──用華語來講，就是「時間尺度」──真大，上基本的，40年做一个單位，半世紀、一甲子，是真普遍。啥物是時間寸尺？就是講，一項代誌會起本質性的變化或者是變革，所經歷所需要的時間的長度。台灣一个萬年國會，就45年，學校無教台灣史，國中階段是52年，高中是61年；一个制憲，由台灣人民自救宣言到這馬（2021），已經57年，閣3冬（2024）就一甲子阿，猶閣看袂到磅空彼頭的光。
咱遠的–莫講，最近大家上關心的「中華台北/Chinese Taipei」的問題，閣3年就40冬，敢會改lih？最近有民間團體做監看報告，除了民視一貫攏是用「台灣隊」稱呼咱的代表隊，開始的時差不多所有的台攏是用「中華隊」，你講台灣是毋是真予人精神錯亂neh？可能因為監看報告的關係，8月初4加（ke）華視、三立兩台用「台灣隊」。這款改變，講起來嘛真被動，照咱頭拄阿講的，Olimpic欲正名，干單咱內部，敢猶閣是半世紀、一甲子才有可能會當改變neh？
我會記tit這本冊頭起先的名稱是「新國家的建築師」，這嘛是1989年盧修一先生競選台北縣立法委員的訴求。建立新國家，是盧委員的初衷（thiong*，毋是tiong），也（iā）是伊一生的志業，伊嘛為著島嶼的這个夢付出坐監的代價。今阿日，咱做伙佇遮來追思盧委員，我們就愛盡咱的氣（khuì）力，完成盧委員kap濟濟的前輩犧牲奮鬥的目標，咱一定愛縮小時間的寸尺，袂當以40年來起跳，閣較袂當50年、60年款款阿等，咱猶（iáu）有外濟年會等tit lih neh？
盧委員是我非常欽佩的前輩，伊對台灣的愛，永遠是咱「為前進而戰」的勇氣的來源。向望咱會當做伙完成伊的願望，彼也是咱的本願。
*衷/thiong，許秀年女士不會講錯的，但年輕歌仔戲演員可會講錯的喔，請有志於講好台語的年輕人要格外注意，不要讀成「中/忠」。
（轉載自：周婉窈 2021/8/10 臉書貼文部落格版）
