【台南場 黨外下晡會短講 3】林宗正牧師：美麗島，親像老母溫暖疼惜（影片）
台灣放送
今年（2025）5/24台南場的「台灣自由民主之路：向黨外運動致敬」下晡會有短講時段，我們邀請吳依潔秘書長、賴中強律師、林宗正牧師來和觀眾分享對黨外運動與當前時局的看法。
這是林宗正牧師的影片，內容非常感人。有與會者說，這是他聽過最能提升人心的演講。宗正牧師的短講，感人肺腑的句句非常多，試摘幾句：
美麗島，親像老母溫暖疼惜。
祖先一代閣一代，注目咧看，看咱怎樣紲接𪜶跤步。祖先一代閣一代，咧吩咐，殷勤拍拚、殷勤開墾。海水清清ê太平洋圍踅著這个苦難ê美麗島。土地是上天相賜、祖公開墾。土地有生出美麗豐富ê土產：稻仔、水牛、弓蕉、玉蘭花。
咱ê祖先敢毋是賞賜咱，永遠無欲屈服ê靈魂，永遠無欲向暴政、獨裁來屈服ê靈魂。敢毋是？敢毋是嘛？
台灣人無家己ê歷史觀，…（中略）…，無家己ê歷史觀，咱就無才調徛佇國際；咱就無才調有家己ê國際觀；咱就無才調寫一部屬於咱家己ê憲法。
咱佇遮欲追揣平安，毋是奴才式ê平安，毋是奴才式ê安定，毋是投降式ê平靜。
彼个會刣咱ê靈魂，會刣咱ê肉體，咱才通驚伊。咱若干焦伊會當刣咱ê身軀–ê，袂害死咱ê靈魂—ê，咱毋免驚伊，敢毋是按呢？
咱ê祖先心懷慈悲憐憫，跤踏中央山脈，放眼七海，去打倒無可能打倒ê敵人，去挽天頂挽袂著ê星，去行一般人毋敢行ê路。
阮ê祖先奉獻佇遮，親族踮遮徛起，阮ê囝孫認同佇遮，別位敢會通比？
（逐字稿在影片之後）
逐字稿／賴欣宜整理、周婉窈校訂
主持人台南妹仔：
罷免真正愛成功，啊無後壁的路有可能會愈來愈歹行。逐家講著毋著？（觀眾：著！）等罷免到後一階段，咱愛出來投票的時陣，請逐家一定愛出來投票。因為咱定定會感覺講啊我有足無閒，我家己人生的代誌，啊毋過一个國家若無好勢，咱逐个人的生活哪有可能會好勢，著無？所以這是足重要的代誌，一定愛提醒逐家。
紲落來乎，咱欲來邀請1987（口誤）年捌佮鄭南榕先生。佮一寡有志，佇台南發動台灣歷史上，頭一擺ê 228紀念遊行，推捒台灣人權運動ê林宗正牧師，來佮逐家講話。
咱來噗仔聲歡迎！
林宗正牧師：
美麗島，親像老母溫暖疼惜。
祖先一代閣一代，注目咧看，看咱怎樣紲接𪜶跤步。祖先一代閣一代，咧吩咐，殷勤拍拚、殷勤開墾。海水清清ê太平洋圍踅著這个苦難ê美麗島。土地是上天相賜、祖公開墾。土地有生出美麗豐富ê土產：稻仔、水牛、弓蕉、玉蘭花。
咱ê祖先心懷公義、智慧、慈悲、憐憫。咱ê祖先釘根本土，咱ê祖先認同所有ê百姓，通過疼佮受苦，來成做這个島嶼信心、向望、佮疼心ê記號。咱ê祖先敢毋是賞賜咱，永遠無欲屈服ê靈魂，永遠無欲向暴政、獨裁來屈服ê靈魂。敢毋是？敢毋是嘛？
毋過今仔日，咱來看咱大部份ê人，咱袂記得咱家己，袂記得咱ê祖先予咱ê遺產，袂記得咱ê祖先予咱ê靈魂，袂記得咱這陣佇佗位？咱未來欲行向佗位去？
因為無家己ê歷史觀，……（聽不清楚）歷史觀。台灣人無家己ê歷史觀，你共咱揣無咱家己ê人生觀，咱無家己ê人生觀，無家己ê歷史觀，咱就無才調徛佇國際；咱就無才調有家己ê國際觀；咱就無才調寫一部屬於咱家己ê憲法。無本土意識，咱偌濟咱ê靈魂已經喪失，隨波逐流，佇物慾中麻醉咱家己。毋敢閣鞭策家己，咱對未來充滿驚惶，就去追揣虛假、物質ê文明。虛華遮ê代誌，家己迷失佇這个世間，虛假ê名聲、地位佮享受。
人生是啥物？人生敢是干焦一場物質ê饗宴，食腥臊、報復性ê旅遊、報復性ê消費，敢是？敢是？毋是！（觀眾：毋是！）性命毋是按呢！
人生最大，人類最大ê革命是啥物？人類最大ê革命，敢毋是用人毋知ê方法減少這个世間濟濟悽慘、不幸、愚望、愚知？人生最大ê幸福、最大ê安慰，敢毋是用人所毋知ê方法予這个社會、予這个苦難ê社會加添進步、繁榮、喜樂、平安、幸福？
咱佇遮欲追揣平安，毋是奴才式ê平安，毋是奴才式ê安定，毋是投降式ê平靜。歷史是一場不斷革命ê接力賽，這是靈魂ê革命、這是性命ê革命。去、去、去追揣進步，去追揣民主，去追揣自由、平等。
Victor Hugo大文學家敢毋是按呢共咱講：我疼你若我本身，來補這个國家ê創傷。
Albert Schweitzer敢毋是共咱講？──我點著我家己，來照光這个烏暗ê非洲。
今仔日咱彷彿閣聽著：咱今仔日佇這个所在，是咱大家欲閣立志，向頭前繼續行。彼个會刣咱ê靈魂，會刣咱ê肉體，咱才通驚伊。咱若干焦伊會當刣咱ê身軀–ê，袂害死咱ê靈魂—ê，咱毋免驚伊，敢毋是按呢？
去追揣天頂ê星，咱ê祖先是啥物？咱ê祖先心懷慈悲憐憫，跤踏中央山脈，放眼七海，去打倒無可能打倒ê敵人，去挽天頂挽袂著ê星，去行一般人毋敢行ê路。我所疼猶賰佇遮ê好朋友，我敢會當佇這个五月，咱大家咧紀念母親ê五月。美麗島親像咱ê老母，毋過咱ê五一九，予別人共咱取消去。
我敢會當借咱大家，將你ê正手提出來，請你攑你ê正手提出來我看一下啦。毋知賰無幾个袂要緊，囥佇你ê胸前，摸著你ê心跳，摸著你溫暖ê體溫。咱佇這个所在，佇這个民主ê聖地，咱敢會當做伙來向上天祈求。雖然咱無仝款ê信仰，毋過大智大慧，大慈大悲ê每一位，若肯為歷史負責任，咱做伙向天來祈禱。
阮為萬民求主照顧，施恩逐國逐族。閣求顧阮最愛ê鄉土，賜福佇阮本國，阮ê祖先奉獻佇遮，親族踮遮徛起，阮ê囝孫認同佇遮，別位敢會通比？予阮勇敢堅強壯膽，防衛國家安全、城市發展、鄉鎮釘根、田園收成充足。予阮深知真理公義，予阮知捌和平真愛，自由詩歌響亮無退，遍地逐位歡喜。
萬般ê主，阮將本國台灣交託佇你聖手，懇求施恩賜福保守，賜福佇阮台灣。
多謝！
主持人台南妹仔：
多謝、多謝林宗正牧師。
