「501埋葬假憲法行動」終場短講之一（周婉窈台文發言稿）
周婉窈
作者按：5月1日由台灣公民陣線、台灣經濟民主連合發起「501埋葬假憲法行動」，有39個民間團體合辦，在宣讀宣言、禱告、行動劇之後，遊行從二二八紀念公園襄陽路口出發，抵達自由廣場，終場有四個短講，最後以讓一中憲法過橋作結。筆者的短講用台語發言，這是發言稿，敬請參考。（2026/5/5）
逐家好。
咱今仔日來參加遊行，最後佇遮聚集，我想社會一定有真濟的人毋知影501是什麼日子，嘛不知影咱那欲埋葬1991年修憲增修的條文。知影歷史真重要，我相信台灣人若知影這遍修憲對台灣的致命傷佇佗位，一定會支持這个遊行的訴求，因為1991年的修憲是「萬年國會」、代表中國法統的老代表修的，毋是代表台灣，毋但無正當性，閣是會害死台灣，這款憲法，咱那閣要挃？
憲法佮法律的問題，我想賴中強律師會講，我就講較歷史德的。
424刺蔣56周年紀念日彼日，刺蔣主角黃文雄先生佇新書發表會，一直提起1992年是「台灣民主化元年」，要逐家知影、會記得。
1992年佇戰後台灣的歷史上真重要，是台灣自由民主化的開始。自由化是1992年5月刑法一百條修正，台灣人才有言論自由的保障，以遮做開始。民主化，上重要的指標是「萬年國會」解散，1992年中華民國選第二屆立法委員，國會會當定期改選才是民主體制。細節咱無法度佇遮講。
總是，1992年台灣自由民主化了後，社會有真好的發展。台灣人真優秀，各行各業攏出真濟的人才，這30冬來，台灣成做真好蹛的所在，真濟少年人去到外國，顛倒懷念台灣的種種，無愛蹛外國，這和戒嚴時代，逐家攏想欲去蹛外國足無仝的。
毋過，佇咱台灣的繁榮、好蹛的背後，其實危機重重。咱的自由民主，若親像是起佇咧海埔仔頂的厝，真四序，毋過隨時會崩去。是按怎講neh？
這就要講著1991年。
1991年第一改的修憲。黨外運動的人士和民進黨，共伊供體講做「老賊修憲」，事實上就是一陣40外年毋免改選的老代表佇咧修法。In修出來的法，上傷重的，就是「一中憲法」佮「一國兩區」。增修條文的前言講；「為因應國家統一前之需要」，所以要按怎閣按怎，這就是一中憲法。既然未來欲統一做一國，所以現此時這个國家分做兩个區：自由地區佮大陸地區。這就是「一國兩區」。
用比喻來講，「一中憲法＋一國兩區」，這就是孫悟空頭殼頂的「緊箍咒」──絚箍仔咒。普通 箍仔箍咧 蓋成無問題，毋過隨時會當來共你束絚，予你真艱苦，甚至共你束死。2024年藍白佇中華民國立法院聯手佇咧做的，就是用絚箍仔咒來凌遲台灣人。
咱翻頭來看1992年以後台灣的自由民主化，這是黨外運動犧牲奮鬥數十年爭取來的，有自由民主的環境，優秀的台灣人就發展了真好。毋過，黨外運動上懸的追求是獨立建國，毋但袂得實現，顛倒愈來愈困難。因為佇這的時陣，拄拄仔講的1991年的修憲，第二冬1992年根據增修條文的「一國兩區」，佇行政院長郝柏村的主導下通過「台灣地區與大陸地區人民關係條例」，具體用法律來規定「兩區」人民的關係。這是咱今仔日上大的困境的來源。
咱比一个例，假使烏克蘭的憲法宣稱未來欲和俄羅斯統一，目前國家分做「烏克蘭地區」佮「俄羅斯地區」，按呢，啥人會去援助烏克蘭來抵抗俄羅斯neh？好佳在，烏克蘭是一個真正的主權獨立的國家，國際上民主陣營才會得去鬥相共。
這个例是不是予你較了解1991年老賊修憲佮第二冬的「兩區條例」是咱台灣的帶身命（致身命）？
過去因為中國的國力無遐強，對台灣的滲透若無遐嚴重，一般人其實嘛毋免關心憲法的問題，日子會過會過就罔過，何況日子真好過，台灣嘛真好蹛。毋過，絚箍仔咒就是佇遐，2024年絚箍仔咒來矣。翁曉玲就是逐日攏佇咧對台灣唸絚箍仔咒。現此時是中國和藍白立委聯手用「憲法的手段」佇咧創治台灣。
咱必須用大刀一刀斬斷「一中的絚箍仔」，這个1991年的修憲若無效，兩區條例嘛無憲法的根據，咱就會當脫離「兩區」的束縛。台灣就是台灣，毋是「台灣地區」。佇中華民國體制下，既然無法度修憲，咱先來共1991年無台灣人民授權、無正當性的第一遍修憲剁挕捒（hìnn-sak），就是共頭殼頂的絚箍仔提落來，剁斷，咱就毋免閣聽in佇遐唸一中咒語。
這提掉，其他完全會當暫時繼續運作。我認為割離1991年的增修條文，其他就當作「過渡憲法」。一寡仔台派的有志會擔心，這是毋是猶閣承認中華民國。我了解有志的掛慮，請逐家放心，台灣的路真歹行，這是過渡。2024年開始到這馬，我想社會中愈來愈多的人，了解著：無真正的國家無可能保護咱的自由佮民主。要有愈濟的人了解著這點，想欲建國，建國才有可能；有真正的國家，台灣的自由民主才有可能繼續維持。咱逐家做伙來宣傳，做伙來拍拚。
