我 ê 同事鄭南榕
江蓋世
此文根據2025年4月7日本人於國史館發表的台語演講稿增刪修訂而成。（作者謹誌 2025/4/12）
《鄭南榕獄中日記》新書發表座談會
日期：2025年4月7日14:30-16:30
地點：國史館四樓大禮堂
主辦單位：國史館
前言
陳儀深館長、葉菊蘭董事長、鄭竹梅董事長，濟濟前輩及多年好朋友，我是前自由時代採訪副主任江蓋世，「恁久無看著，大家好！」（客語）
咱逐家有看tio̍h 大廳背後， 有一幅書法字圖「為國存史」，佇（tī）我ê心內，這是為「台灣國」保存歷史史料。
今仔日欲來分享ê題目是「我ê同事鄭南榕」，分作三部分：
一、Nylon tī 519； 二、 Nylon tī 獄中；三、 Nylon tī 雜誌社。
一、Nylon tī 519
秘密會議
1986年年初，菲律賓黃絲帶革命、韓國修憲簽名運動，咱台灣袂使（bē-sái）宣傳「千人組黨簽名運動」？我共（kā）Nylon講幾若擺，伊一句話「你就去寫文章就好」。
1986年3月， 有一日Nylon講「蓋世，暗時來阮兜（guán tau）講代誌（tāi-tsì）」，鄭南榕、吳乃仁kah我，阮三人會議，佇Nylon ê厝內樓頂日本式房間。
伊想beh發動一場反戒嚴示威，日期定tī 1986年5月19。
第一天（1986.3.10.） 暗時，Nylon號名「千萬人抗議戒嚴運動」。
第二天（1986.3.11.） 他早時叫我寫文案，準備tī咱雜誌頂面來打廣告。
第三天（1986.3.12.） 他改名稱 叫做「519綠色行動」。
我就問：「為啥物（siánn-mih）欲改咧？『千萬人抗議戒嚴運動』，毋是（m̄ sī）較有氣勢啊？」
伊當場教我「廣告行銷學」，運動口號愛簡單清楚：
519（代表「戒嚴日」），綠色（代表「和平」），行動（代表「示威」），以後逐禮拜tī咱週刊封面內底，來拍（phah）廣告。
TIME雜誌
1986年3月中「519綠色行動」宣傳兩禮拜後，3月26，這一日，Nylon臨時通知我，講阿啄仔（a-tok-á）記者欲來雜誌社，伊叫我轉去雜誌社鬥相共，我心內擔心我的英語真兩光……。
原來是TIME香港分社主任波頓（Sanda Burton）女士，特派員沙蕩（Don Sapiro）先生，欲訪問519綠色行動。
彼工Nylon胸前結綠絲帶親自接待，伊全程用英語來說明「519 Green Action」ê意義，Nylon就家己來案內（àn-nāi）彼兩位美國記者，對（tuì）門口就解釋：結綠絲帶（green ribbon）、519（stands for Martial Law Day戒嚴日）、Green（stands for peace 和平）、Action（stands for demonstration示威）。
阿啄仔（a-tok-á）ê英語我聽無啥有， Nylon ê英語我攏聽有，因為伊用台語共（kā）我講過兩三遍矣。
Nylon是特立獨行，真有個性ê人，我無啥了解伊，一直到現此時（hiān-tsú-sî）。
無言暗頓
有一工， Nylon請吃飯，卻攏無愛（bô ài）講話，干單目睭佇咧（tī-leh）看我後面ê壁，我只好飯扒扒咧，就趕緊旋（suan）走。
第二工，我講這ê故事予眾同事聽，逐家聽tio̍h哈哈大笑，Nylon卻覕（bih）leh後壁，偷偷–ah kah阮做伙（tsò-hué）笑，這就是伊ê幽默。
西裝示威
1986年519行動，彼一日炎天赤日，龍山寺廣場，南北二路人馬，大家攏身穿短衫，跤穿布鞋，但是獨獨有一位總編輯，伊堅持穿西裝、結ne-kut-tái、穿皮鞋。
1990年我飛去美國亞特蘭大，參加金恩中心舉辦ê非暴力研習營，佇遐ê研究，我才注意tio̍h，60年代民權示威時，金恩博士等領導人士，行第一排，攏穿西裝結ne-kut-tái，一份資料講出理由，怹（in）愛穿正式服裝，要求美國社會愛平等對待黑人，毋（m̄）通歧視。
二、Nylon tī獄中
逮捕入獄
1986.6.2.（一）10:30am Nylon予警方掠去矣。
彼日1:30pm 台北地院開庭，消息傳來，逐家趕去聲援。眾人面憂面結，獨獨李敖笑咳咳對我講：
「蓋世啊，恭喜啊，你們的總總編輯進去了。」（華語）
「為什麼恭喜？」（華語）
「他求仁得仁！」（華語）
情詩批信
1986.6.2-1987.1.24 Nylon獄中日記出版，感謝國史館出版，留下寶貴資料。
前個月，國史館編輯人員，有邀請我與談，傳來1986.12.2.我kah Nylon ê 獄中通批，彼是39年前，我寫予Nylon ê批。批中我有kah伊講：
「敝社有人說，你像一首小詩，讀你一千遍，也不會厭倦。」（華語）
伊用紅筆佇（tī）批頂頭講：「編按：就是蓋世自己說。」（華語）
「這種情詩可以多寫幾封來吧！請發動小姐們一起來寫。」（華語）
今仔日主辦單位ê安排，菊蘭姐拄拄仔好坐tī我ê面頭前，我會使講：
「chit張批是我頂個月才看tio̍h ê，當然，我無發動任何人寫情詩予伊喔。」
但是，39年前為啥物，我會寫遮爾優美ê情詩予Nylon咧？我竟然想袂起來！
前幾工我查網路才知影ê，原來，彼句短短情詩毋是（m̄ sī）我寫的，彼是1984年，一首蔡琴唱紅ê流行歌曲〈讀你〉，內面的一句歌詞：「你是我的詩篇，讀你千遍，也不厭倦。」（華語）
這首歌創作者梁弘志真早過身，過身進前，伊bat有共（kā）蔡琴講：「〈讀你〉讀的不是情人，讀的是《聖經》！」
父女情深
我佇（tī）自由時代上班ê時，上愛看tio̍h竹梅下課了後，來雜誌社。
這是為啥物咧？因為，Nylon看著竹梅出現tī雜誌社，就會去抱竹梅，或者綴竹梅佇雜誌社內底踅來踅去，伊就袂揣我留落來講代誌，我就趕緊來旋走。
39年前的「鄭南榕獄中日記」，冊內底，Nylon有寫予竹梅5封家書，其中有一段，我唸予逐家聽，這是歷史原件，我用華語來唸，以保留原來ê字句：
「爸爸最近還是天天跑步，吃得飽，穿得暖，而且還在晚上冷冷的天氣洗冷水澡，沒有感冒，你說棒不棒？」（華語）
父女情深，遮ê批信是Nylon寫ê，我一張一張，對頭看到尾。
三、Nylon tī雜誌社
海外專訪
1987年初，我想欲出國，去海外訪問台灣人運動，但是，我ê出境證申請無落來。
我共（kā）Nylon講，既然我袂當出去，無者，我來敲電話，敲去國外，來訪問海外台灣人運動領袖，訪問稿刊tī咱《自由時代》雜誌，直接挑戰戒嚴時期ê台獨言論最高禁忌？Nylon講：「好啊，你負責採訪，我來負責對外聯絡。」
彼陣，兇戒戒ê法律抑袂廢除，咱講台獨就是叛亂罪。
因此，對1987.3.1.到1987.4.22.期間，我得tio̍h Nylon ê全力支持，放手予我tī《自由時代》，陸陸續續專訪海外台灣人運動領袖，比如許世楷、彭明敏、洪哲勝、陳唐山、張燦鍙等，公開發表。
In攏是國民黨政權ê黑名單，有ê人嘛是台獨通緝要犯。
這是戒嚴時期，頭一間黨外雜誌社，敢公然刊出「台獨通緝要犯」ê言論。
台獨專訪
1987.4.22.暗時，雜誌社全員備戰，燈火通明，等待「世界台獨聯盟」總主席張燦鍙博士ê電話。等待中，逐家心情歡喜，擱真緊張…..。
彼當時，Nylon叫我去總編輯室，聽伊演講ê錄音帶，就是佇1987.4.18.金華國中彼場。
錄音帶內面，Nylon伊用台語，大聲喝出彼句名言：
「我叫做鄭南榕，我主張台灣獨立！」我有聽tio̍h錄音帶，傳來觀眾熱烈ê噗仔聲。
Nylon一直噗薰（pok-hun），辦公室內走來走去，笑容滿面，老神在在，親像欲辦一場喜事。
「鈴！……」美國電話敲來矣。
電話接過來予我，對方講：「我是張燦鍙。」我確認對方就是海外頭號通緝叛亂犯張燦鍙，我講：「你好，我已經等你足久了！」頭一擺聽tio̍h伊輾轉典雅ê台語，予我印象足深。
我ê訪問題綱，有提早傳去予伊。我一手提電話， 一手攑筆，開始訪問。
我一直重複問伊：「你講 ê，敢是按呢？」來確定每一句話原意。
1987.4.23.透早零時空10分（0:10 am）一直訪問到一點25分（1:25 am），前後1點鐘閣15分鐘，越洋專訪才結束，chit篇越洋電話專訪嘛完成啊。閣紲來，就是kah時間比賽，主編、總編、打字、標題送打、美編、送稿、製版、印刷、發行……全社總動員。
1987年4月25日「自由時代」，Nylon將這篇張燦鍙專訪全文照登，標題是〈把台灣建成一個「東方的瑞士」〉，以封面故事刊出，短短兩天，《自由時代》全體員工，完成了一場大車拚，拍破國民黨政權ê台獨禁忌！
新聞報導獎
後來發展 ，鄭南榕和我， 因為這一連串海外台獨系列報導，阮兩人共同得到「台灣戒嚴時期普立茲新聞報導獎（Pulitzer Prize）」ê 提名，提名ê 機關就是「台灣高等法院高檢處」，阮兩人表現傑出ê事實就是，一個總編輯， 一個採訪記者，兩人「新聞報導，涉嫌叛亂，表現傑出」。
當然，過去台灣並無chit款「普立茲新聞報導獎」，這是當年自我消遣ê講法，戒嚴時期，攑筆ê人，會涉嫌叛亂。實情就是，1987.9.19.「台灣高等法院高檢處」以鄭南榕kah江蓋世涉嫌叛亂，所以，用「他字案」來偵查。後來，阮兩人分別閣用別 ê事件，來偵辦涉嫌內亂案件。
一個總編輯，一個採訪記者，tī戒嚴時期，會當共同有這段經歷，這是我前半生真美好的回憶。
法國畫家雷諾瓦（Auguste Renoir）名言：
“The pain passes, but the beauty remains.”
「苦痛（Khoo-thang）過去，美麗留存。」（台語）
感謝我ê同事鄭南榕，感謝大家，恁仔細（客語）。
前自由時代採訪副主任 江蓋世
2025/4/7發表，2025/4/12完成修改台語演講稿
