講阮小妹晴美──黃文雄訪談手稿（台文版 2018/04/08）
黃文雄
各位海外同胞，感謝逐家按呢疼惜晴美，按呢熱心來參加這个追思會，我代表黃家，嘛代表已經佇天頂的晴美，佇遮向逐家說謝。非常感謝！
佇台灣人民追求自由民主、追求獨立自主的歷史內面，一九七〇年發生的刺蔣，已經是半世紀前的代誌，袂輸某一種的「史前史」。台大歷史系的周婉窈教授最近有講，一直到三一八太陽花彼幾年，佇台灣民主運動內，女性一直干焦有「背景式的存在」，半世紀前的「刺蔣」自然更加是按呢。晴美的事蹟毋是完全無人知，毋過通常是干焦一部份爾。今仔日我想欲就伊一九七〇年以後的一生分做三段簡單講一下，希望幫助逐家對伊有較完整的認識佮了解。
第一段是一九七〇年的刺蔣。雖然刺蔣是對獨裁政權主動的攻擊，毋是被動的受難，誠濟人往往就是有一點點仔共伊當做是政治受難者家屬。這當然也是事實，但是晴美的角色絕對毋是干焦按呢爾爾。伊佇咧刺蔣小組內面是一个全面的參與者，一个full partner。我無時間報告細節，干焦會用咧舉一个例。譬如講為著防備暗殺現場有便衣的「暗樁」佮臨時檢查，銃是囥佇伊的皮包內，這是伊想出來的。前一日去Hotel Plaza偵察，也是我佮伊做一个進行的。欲按怎手裡提飲料（看起來較成一般的遊客），必要的時按怎裝做情人交銃……攏是伊的設計。
暗殺不幸失敗了後，我和鄭自才予警察掠去，伊的誠濟工課才欲開始爾爾。譬如講，伊厝內猶有另外一支銃必須較緊處理挕捒（hìnn-sak）；較免講逐家也想會到的其他誠濟代誌，律師、探獄種種等等。予人誠感動的是，伊誠早就有萬一的拍算，已經安排好佇一間Montessori School教冊，通飼伊家己佮兩个囝兒。
我想欲講的第二段，對鄭自才得著瑞典的政治庇護開始。一九七一年十一月晴美也𤆬兩个囡仔去瑞典，但是半年後美國政府就開始要求引渡自才。雖然因為兩个性格袂合，晴美早就想欲離婚，但是自才落難，伊就離婚的代誌馬上就囥咧一爿，全力支持自才，因為救援──尤其是國際救援──的工課需要有伊去扮演牽手的必要的角色，佇瑞典、佇倫敦、佇美國，對一九七一年到一九七四年底自才假釋出獄為止。這段「萬里救夫」是較濟人知影，也受著感動的一段，但是少數人知影、盡量無愛去講的是，自才出獄轉來瑞典以後，怹兩个就先分居才辦離婚。有的人有這款的「顧忌」，袂輸兩个若無閣做一个，「萬里救夫」的故事就無遐爾完美。事實上先分居才離婚以後，一九七六年鄭自才和吳清桂女士結婚、生一个囝；一九九一年晴美也佮瑞典的公共雕塑家Percy Andersson結婚，兩家互動親密，清桂和晴美也變做親近的好姐妹。咱欲拍倒蔣政權，目的之一是予社會文化有進步的空間。比起堅守「賢妻良母、萬里救夫」的傳統期待，這敢是才是一个較文明、較進步、較美滿的結局？這是晴美這位女權主義者的一面，我一定愛講出來。
這兩段了後，我一定愛講晴美人生的第三段，這是誠少人知影的一段。佇咧救援自才的過程中，晴美認識袂少國際的進步人士，尤其是瑞典的進步人士，伊的翁婿Percy這个公共雕塑家就是其中的一个。伊佮Percy結婚前、結婚後，攏總生活佇進步人士的箍仔內，所過的是一个非常有意義的日子。這个箍仔內的人攏是國際主義者，關心的對象當然也包括台灣。譬如講，台灣對瑞典這个福利國家有趣味的人袂少，怹去瑞典的時，毋但會受著怹（Percy和晴美）的接待，也受著怹箍仔內朋友的協助。我無時間講細節，但是我會用得講晴美毋但是台灣的晴美，佇咧伊人生上尾仔一段，晴美也是國際的晴美，雖然伊對台灣猶是有較偏心，譬如講有機會轉來台灣了後，一向關心母語存亡的伊，馬上就投入救台灣母語的運動。佇故鄉最近出版紀念（晴美）的文集，逐家猶有法度看著伊母語的寫作。
雖然晴美最後幾年有著著Alzheimer’s，但是有一个愛伊的翁婿佮國際同志，同時也因為失憶，因為無必要操煩，事實上，有時伊看起來顛倒較快樂、甚至較少年；最後的「大動脈病變」，也干焦有一、二日的艱苦爾爾。雖然伊經歷過誠濟予人疼惜、也予人欽佩的苦難，但是整體講起來，我這个大兄干焦會用得按呢講，我這个154公分的小妹，她的人生是一个精采的人生，一个有意義的人生，一个會值咧celebrate的人生。
我按呢講，可能有一个愛小妹兼同志的阿兄安慰家己的成份，但是無論是毋是按呢，我相信這才是一个較完整、較完全的晴美的圖像。我希望逐家為晴美的過身毋甘、思念以外，繼續為台灣拍拚的時陣，頭殼內的晴美是這款的圖像。
感謝，非常感謝！
By黃文雄，2018/4/8於台灣台北
（文章轉載自：臺灣與海洋亞洲 2022/06/29 網站文章）
